المختصر المفيد في استخراج كارنية نقابة المحامين لأول مرة (جدول عام) 2013
أ - سحب الطلب من النقابة الفرعية (مش مستاهلة المشوار للقاهرة).
ب - استيفاء الأوراق المطلوبة.
جـ - تقديم الورق ودفع الرسوم (والخطوة دي في النقابة العامة في القاهرة).
الرسوم علشان اللغط الكتير والهبل اللي انا سمعته من ناس كتير
1550 + 250 للكشف الطبي = 1800 جنية
-----------------------------------------------------
** النقابة الفرعية مقرها ميدان المحطة في المنصورة
-----------------------------------------------------
** الأوراق المطلوبة.
01- شهادة ميلاد مميكنة.
02- صحيفة الحالة الجنائية موجهة للنقابة (خد بالك لأن ليها تاريخ إنتهاء بعد 3 شهور).
03- شهادة تحديد موقفك من الخدمة العسكرية. (وطبعاً دي للرجالة بس البنات ملهاش).
04- شهادة الحصول علي الليسانس (الشهادة المؤقتة).
05- عدد 6 صور شخصية (خلي معاك 8 احتياطي).
06- صورة البطاقة.
07- شهادة من أحد المحامين المعتمدين من النقابة بالنقض أو بالإستئناف (دي في وش الطلب اللي سحبناه من النقابة الفرعية).
08- شهادة عن السمعة تعتمد من 2 موظفين وتختم بخاتم المصلحة الحكومية ( ودي في ظهر الطلب اللي سحبناه من النقابة الفرعية).
09- مبلغ 250 جنية للكشف الطبي ( بتشتري نموذج من النقابة العامة من القاهرة وبتطلع تعمل الكشف الطبي جنب النقابة - النموذج ب 250 جنية).
10- شهادة من التأمينات (ده لو معاليك تجاوزت 24 سنة).
11- شهادة من الجوازات (ده بردو لو حضرتك تجاوزت 24 سنة).
وبكده نكون خلصنا الأوراق المطلوبة ولو لسه عايش هتكمل معانا في الجولة قبل الأخيرة
-----------------------------------------------------
** الخطوة قبل الأخيرة
معاليك هتسافر القاهرة علشان تقدم الورق وتدفع الرسوم في النقابة العامة
01- النقابة العامة في 49 شارع رمسيس.
02- مواعيد العمل من 9 صباحاً لـ 3 مساءاً.
03- بتاخد الورق اللي إنت خلصته وبعدين بتروح شباك تقديم الطلبات (مبقاش اسمه شباك 5). بيراجع الورق وبيديك الملف تكتب البيانات عليه بخط واطح وكويس.
04- بتشتري نموذج كشف طبي من النقابة (العامة) بـ 250 جنية وده الجديد لأنه تم إلغاء نموذج 111 تأمين صحي.
05- بعد ما بتشتري النموذج بتطلع علي المستشفي جنب النقابة تعمل الكشف الطبي وترجع النقابة.
06- تروح الخزينة تدفع 1550 رسوم الإنضمام للنقابة تديله الملف كله وهيرجعهولك ومعاه الإيصال (الخزينة في وش شباك تقديم الطلبات علشان ما تتوهش).
07- بتاخد الإيصال الأصل والصورة والملف وترجع شباك تقديم الطلبات وتديله الملف والإيصال بيراجع الورق لآخر مرة.
08- بيحدد لحضرتك ميعاد حلف اليمين وإستلام الكارنية.
* ملحوظة
01- شباك تقديم الورق من عند البوابة تمشي شمال في يمين.
02- بالنسبة للمواصلات أنا أنصحكم بالقطار علشان هتنزل في ميدان رمسيس جنب النقابة وابقي اركب مترو أو تاكسي ده لو مش ناوي تمشي.
03- الإيصال اللي بتاخده كمبيوتر (خلاص بقي الكربون بقي موضة قديمة).
04- تستني وتسمع من الموظف الميعاد المظبوط لحلف اليمين وإستلام الكارينة.
-----------------------------------------------------
الخطوة الأخيرة
حلف اليمين وإستلام الكارنية
بتروح في الميعاد المحدد مطقم بدلة وكرفات وتدخل زي الشاطر علي القاعة لغاية لما يبتدوا ينادو الأسماء
وبعد ما بتخلص سواء طلعت تحلف أمام النقيب أو رددت القسم من بعيد
بتروح الشباك وسط الزحمة علشان تستلم الكارنية
-----------------------------------------------------
وبكده ألف ألف مبروووووووووك بقيت محامِ قد الدنيا.
-----------------------------------------------------
منقول
